Weil´s nacha Zeit is, drum schreit dös kloa Kind,
wann´s Supperl net gleih zua rechtn Zeit kimmt,

Weil´s nacha Zeit is, sagt da Lehrer i da Schui;
da ramans schnell zsam und weg sans im Hui.

Weil´s nacha Zeit is, brummt der Moasta zum Gsölln;
er woaß ja, dass eh net z´lang orbatn wölln.

Weil´s nacha Zeit is, singt´s Vogerl am Bam
und schliaft i sei Nesterl, ins Betterl, ganz zahm.

Weil´s nacha Zeit is, läutn Glockn am Turm
tägli zua Mess, nur seltn zum Sturm.

Weil´s nacha Zeit is, sagt der Baur dann zum Knecht;
wer fleißi is gwen, derf rastn a recht.

Weil´s nacha Zeit is, sagt da zittrige Greis;
er schliaßt seine Augn und macht die letzt´ Reis`

-Mathilde Blöchl